लग्न करण्यापूर्वी प्रत्येक पुरुषाने एकदा नक्की वाचावे असे काही

Love

लग्न ही खरंतर केवढी मोठी गोष्ट. तन, मन, धन, सामाजिक पत, प्रतिष्ठा, स्वत्व, स्वाभिमान या साऱ्यासह एक नातं स्वीकारावं लागतं. ते स्वीकारताना आपण काय विचार करतो ? प्रिया मित्रानो, लग्न होणार असलेल्यांनी आणि झालेल्यांनी हा लेख वाचवा आणि कुठेतरी सांभाळून सेव्ह करून ठेवा परत वाचण्यासाठी. ‘बायको नोकरी करणारी असावी, ती स्मार्ट असावी, चारचौघींत उठून दिसावी’ अशी तमाम नवरे मंडळींची इच्छा असते. या सोबत तिने ‘गृहकृत्यदक्ष’ आणि ‘आदर्श सून’ असणंही मस्ट असतं. पण, तीही आपल्यासारखी एक माणूस आहे. तिच्या भाव-भावना, इच्छा-आकांक्षा, तिची परिस्थिती कशी असू शकते, याकडे मात्र या नवरे लोकांचं दुर्लक्ष होतं, नवऱ्याचा बायकोकडे पाहण्याचा दृष्टिकोन कसा असावा.

उद्या कदाचित तुझं नोकरी करणाऱ्या मुलीशी लग्न होईल, त्यावेळी जरा हे वास्तवही लक्षात घे. ती तुझ्याएवढीच शिकलेली असेल, तुझ्याएवढाच पगार कमावत असेल. ती देखील तुझ्यासारखीच व्यक्ती असेल, त्यामुळे तिचीही स्वप्नं असतील, आवडी असतील, तिनेही आतापर्यंत कधीच किचनमध्ये पाऊल टाकलं नसेल, अगदी तुझ्यासारखंच किंवा तुझ्या बहिणीसारखं. तीसुद्धा अभ्यासात बिझी असेल आणि मुलगी म्हणून कसलीही सवलत न देणाऱ्या या स्पधेर्च्या युगात पुढे जाण्यासाठी धडपडत असेल, अगदी तुझ्यासारखीच! तिनेही तुझ्याप्रमाणेच वयाची २०-२५ वर्षं आई, बाबा, बहीण, भाऊ यांच्या प्रेमाच्या सान्निध्यात घालवली असतील, आणि तरीही हे सारं मागे सोडून, तिचं घर, प्रेमाची माणसं यांना दूर करून ती तुझं घरं, तुझं कुटुंब, तुमच्या रितीभाती स्वीकारायला आली असेल. पहिल्याच दिवशी तिने मास्टर शेफप्रमाणे स्वयंपाक करावा अशी सगळ्यांची अपेक्षा असेल. नेहमीच्या बेडवर तुम्ही डाराडूर झोपलेले असताना ती मात्र सर्वस्वी अनोळख्या असलेल्या वातावरणाशी, अनुभवांशी आणि किचनशी जुळवून घेण्याचा प्रयत्न करत असेल. सकाळी उठल्या बरोबर तिने चहाचा कप हातात द्यावा आणि रात्रीचं जेवणही तिच्याच हातचं असावं अशी अपेक्षा असेल, तिलाही ऑफिसच्या कामाच्या डेडलाइन पाळताना उशीर होत असेल, ती सुद्धा कंटाळली असेल, कदाचित तुमच्या पेक्षा थोडी जास्तच, तरीही तिने तक्रारीचा सूर लावू नये असंच तुम्ही म्हणाल. नोकर, स्वयंपाकी, बायको, यापैकी तिला एखादी भूमिका करायची नसली तरीही आणि त्यातही तुमच्या तिच्या कडून काय अपेक्षा आहेत हे देखील शिकण्याचा ती प्रयत्न करत राहील. ती सुद्धा थकते, कंटाळते पण सतत टुमणं लावू नये आणि तुझ्या पेक्षा पुढे जाऊ नये या अपेक्षाही तिला माहिती असतात. तिचा स्वत:चा कंपू असतो, त्यात मित्रंही असतात आणि तिच्या ऑफिस मधले पुरुष सहकारी ही तरीही ईर्ष्या, अनावश्यक स्पर्धा आणि असुरक्षिततेच्या भावनेने तुमच्या मनात घर करू नये म्हणून ती बालमित्रां पासूनही दूर राहते. कदाचित तिलाही लेट नाइट पाटीर्त जायला, धमाल करायला आवडत असेल, पण तुम्हाला आवडणार नाही म्हणून तू सांगितलेलं नसतानाही ती तसं करत नाही. मित्रानो, आपल्या या अनोळखी घरात केवळ आपण एकच तिच्या ओळखीचा, जवळचा असतो, त्यामुळे आपली मदत, संवेदना आणि सर्वात जास्त महत्त्वाचं म्हणजे अण्डरस्टॅण्डिंग आणि प्रेम मिळावं अशी तिची अपेक्षा असेल पण अनेक जण हे समजूनच घेत नाहीत. एक सांगू, स्वत:कडून पूर्ण प्रयत्न करून ती हे नातं सुंदर करेल, तुम्ही मदत केली आणि विश्वास ठेवला तर हे नातं जीवनातलं सर्वाधिक यशस्वी शिखर गाठू शकेल.

हल्ली लग्न करण्याचं वय वाढलेलं आहे. लग्न न करणाऱ्यांची संख्याही वाढलेली आहे. पण तरी जगात अजूनही लग्नसंस्था टिकून आहे. भले त्याचे निकष बदलले असले तरीही. मुळात प्रश्न असा आहे की लग्न का करायचं ? आता या प्रश्नाचं प्रत्येकाचं उत्तर वेगळं असेल. कोणी म्हणेल आयुष्यात साथ नको का कोणाची तरी ? म्हणून लग्न. कोणी म्हणेल मुलं जन्माला घालून वंश पुढे चालवायला हवा म्हणून लग्न. कोणी म्हणेल लग्न केलं पण विचार नाही केला. घरचे म्हणाले कर, आसपास सगळ्यांचीच लग्न होतात, ते बघितलं म्हणून म्हटलं आपणही करू या लग्न. काही पुरुष म्हणतील, करून खायला घालायला, घर चालवायला, आईनंतर कोणीतरी हवं, म्हणून लग्न. बायका म्हणतील माझं घर, माझा संसार असं भातुकलीसारखं प्रत्यक्षातही हवं म्हणून लग्न. तशी कारणं तर खूप आहेत पण बहुतेक वेळा कारण न कळताच आपल्यापैकी बहुतेक जण लग्न करतात आणि इतरांनाही करायला सांगतात. लग्न ही खरंतर केवढी मोठी गोष्ट. तन, मन, धन, सामाजिक पत, प्रतिष्ठा, स्वत्व, स्वाभिमान, आयुष्यातली महत्त्वाची २५-३० वर्षं ज्यात जातात अशी गोष्ट. पण तितक्या गंभीरपणे लग्नाचा विचार होतो का ?

Leave a Reply

Your email address will not be published. Required fields are marked *